Урологија

Историја

Службата за урологија, како самостојна единица при Медицинскиот центар, своите почетоци ги прави на први јануари 1985 година, кога се здоби со посебен персонал и свои простории со 15 болнички легла во рамките на машкиот тракт на Одделението за хирургија.

Основач на современата урологија во Битола е проф.д-р.сци.мед. Петар Илиевски. Периодот на неговото доаѓање во 1976 година може да се означи како почетокот на Урологијата како посебна гранка. Под негово водство службата е прва во Република Македонија која воведе транс-уретрална ресекција на простата, мочен меур, уретра, како и прва во земјата која набави опрема за ултра звучна нефролитотрипсија и уретеролитотрипсија. Во тоа време службата соработуваше со сите поголеми уролошки клиники, и тоа во Скопје, но и надвор од земјата односно во Белград, Загреб, Љубљана, Лос Анџелес, Сан Франциско, Штудгарт и Минхен.

Илиевски, во 1997 година заминува на функција Министер за здравство на Република Македонија, но успешното работеше на службата го продолжуваат неговите колеги, врвни стручњаци во оваа област: д-р Радослав Наковски, од 2014 година доктор во пензија. Тој е автор на бројни колумни, учесник на многубројни работилници, семинари и меѓународни конгреси, како и добитник на многу награди, меѓу кои и плакетата “Свети Наум Охридски” во 2014 година. Тоа е признание за трудот што го вложувал во кариерата како лекар и уролог во текот на цели 37 години. Член е на Македонското здружение на неуролози и на Светското уролошко здружение. Бил дел од тимот кој во рутинска практика ги воведува уролошките едноскопски методи како ТУРП, везикална ендоурологија и утерореноскопија.

Во рамките на истиот тим е и д-р Трајко Батанџиевски, кој доаѓа како специјалист уролог од Република Србија од почетокот на службата и раководи со неа во периодот од 1997 до 2006 година и од 2010 до 2013 година.

Потоа, д-р.сци.мед. Виктор Јанковски, врвен оператор, професор по хирургија во средното медицинско училиште “Д-р Јован Калаузи”-Битола, професор на Високата медицинска школа во Битола и професор на Ветеринарниот факултет во Битола. Автор е на многубројни трудови и публикации, како и на универзитетски учебници од областа на хирургијата. Неговата смрт беше голема загуба, како за самата служба, така и за урологијата како наука.

Во изминатите години службата изгуби многу од својот стручен кадар, прекрасни луѓе, врвни дијагностичари и професионалци во својата работа, д-р Павле Крстев, д-р Стефан Јовановски, раководител на службата од 1997 до 2006 година и д-р Коста Дога, сите специјалисти уролози.

Основна дејност

Службата за Урологија се занимава со оперативно лекување на заболувања на бубрег, надбубрег, уретер, ретроперитонеум, бешика, простата, машки полови органи, како и со гинeколошка урологија. Организира и предавања за рано откривање и лекување на малигните заболувања.

Од 2011 година во оваа служба функционира и апаратот за ESWL (екстракорпорална литотрипсија). Апаратот го донираше Mинистерството за здравство на Република Македонија и со истиот успешно се решаваат калкулозите во бубрег, уретер и мочен меур.

Натамошна задача на службата е и понатаму да ја осовременува опремата, посебно со воведување на лапароскопија и нови хируршки процедури во терапеутскиот дијапазон.

Организациона поставеност

По својата организационата структура Службата за уролошки заболувања располага со:

• Одделение – стационар
• Оперативен блок ( TUR сала и сала за отворена хирургија)
• Специјалистичка амбуланта
• Кабинет за ESWL

Високо едуциран кадар

Денес, Службата за уролошки заболувања располага со високо едуциран кадар и тоа:

Лекари – специјалисти уролози:

• Д-р. Илија Келепуровски – раководител
• Д-р. Трајко Батанџиовски
• Д-р. Зоран Поповски
• Д-р. Стојан Батанџиовски